Այո, սա իրականություն է.

MateBook.Պլանշետ-տրանսֆորմեր,որն աշխատում է Windows 10 օպերացիոն համակարգով

 

2016-ի ձմռանը Իսպանիայի Բարսելոնա քաղաքում կայացած հերթական MWC-ի (Mobile World Congress) ժամանակ չինական Huawei ընկերությունը ներկայացրեց իր նորույթներից մեկը` MateBook-ը` արժանանալով մամուլի բազմաթիվ դրական գնահատականների:

 

Հստակ, կոնկրետ, առանց ավելորդությունների` թե անվան, թե դիզայնի մեջ:  

Դասական ոճով այս պլանշետը հատկապես «աշխատանքի մարդկանց» համար է:

 

Նախեւառաջ այն բանի շնորհիվ, որ Matebook-ն ունի ընդամենը մեկ տեսախցիկ, այն էլ` դիմային: Տեսախցիկը հիանալի որակ է ապահովում տարատեսակ կոնֆերանս զանգերի և այլ գործնական նպատակների համար:

Բայց Huawei-ը Huawei չէր լինի, եթե ներկայացներ այսպիսի պարամետրերով միայն սովորական պլանշետ. Matebook-ը տրանսֆորմեր է, եւ այն ցանկության դեպքում վերածվում է նոութբուքի. ընդամենը պետք է էկրան պլանշետը կցել առանձնացված ստեղնաշարին:

Ու այո, այդ առումով գուցե համարեք, որ տրանսֆորմեր պլանշետը նորություն չէ, որովհետեւ մինչ այդ այդպիսի արտադրանք արդեն մեզ ներկայացրել էին այլ ընկերություններ, ինչպիսիք Apple-ը: Բայց ինչպես բազմաթիվ արձագանքներում է նշված, տարբերությունները զգալի են. նախ, նշում են նրանք, տպավորություն է, որ  Huawei ընկերությունը իր տարբերակը արտադրելուց առաջ հաշվի էր առել մյուսների թերությունները, եւ դրանցից զերց մնացել, ինչպես նաեւ չմոռանանք, որ  Matebook-ն աշխատում է Windows 10 օպերացիոն համակարգի հիման վրա: Մեղմ ասած` աննախադեպ է:

 

Հիմա անցնենք պարամետրերին:

 

Հետնամասն ինչպես ասեցինք դասական է ու հարթ. առանց որեւէ ավելորդությունների: Միայն ընկերության լոգոն: Դիմացից էկրանի վերեւի հատվածում, ինչպես արդեն նշեցինք, տեսախցիկն է, կողքից ընդամենը երկու միացման կետ, որոնցից մեկը ականջակալների համար:

Բայց ընկերությունն իր սպառողներին առանձին` ավելի հետաքրքիր լուծում է առաջարկել:  Matebook-ի հետ կարող եք ձեռք բերել նաեւ առանձին դոկ-կայան, (ընդամենը սովորական լիցքավորիչի չափսերի) որն արդեն միանում է պլանշետին եւ ունի HDMI, RJ-45, 2 USB 3.0 Type-A, USB Type-C եւ նույնիսկ D-Sub:

 

Չմոռանանք նշել նաեւ, որ առաջարկվող հարակից պարագաների թվում է MatePen գրիչը: Այն իր մեջ ներառում է գրիչի, մատիտի, եւ ընդհանրապես, գեղարվեստական գործիքների (այդ թվում վրձին եւ այլն), լազերային հրահանգիչի եւ պրոյեկտորի կառավարման պուլտի գործառույթներ:

 

Ի դեպ, ասում են` այդ գրիչով հաճույքով ստեղծագործում են ոչ միայն դիզայներները:

Հատուկ գովասանքի է արժանի ստեղնաշարը: Սա առանձին պատմություն է:

 

Սովորական ստեղնաշարով հաճախ աշխատող մարդիկ գիտեն, որ հարմարավետ ստեղնաշարը լուրջ խնդիր է: Եւ հենց այդ պատճառով էլ, հաճախ մարդիկ հրաժարվում են աշխատել, օրինակ` Netbook-ներով` դրանց ստեղների չափսերի անհարմարության պատճառով:

 

Բայց MateBook-ն այդ հարցը եւս պատվով է լուծել: Այն ոչ միայն հարմար է անգամ մթության մեջ աշխատելու համար, քանի որ ունի ներքին լուսավորություն, այլեւ ստեղները լիաչափ են. այսինքն, չափսերով համապատասխանում են սովորական նոութբուքերի ստեղների չափսերին, ոմանցից էլ` նույնիսկ մի քիչ ավելի մեծ են:

 

Ասել է թե` այս ստեղնաշարով աշխատելիս որեւէ անհարմարություն չեք զգա:

Դե իսկ այժմ անցնենք հիմնական պարամետրերին եւ տեխնիկական բնութագրիչներին:

 

Էկրանը` TFT IPS, 12, 2160x1440 հագեցվածությամբ մուլտիթաչ

Պրոցեսորը` երկու միջուկանոց Intel Core m5-6Y54, 1,1 ԳԳց (մինչեւ 2,7 ԳԳց)

Գրաֆիկական արագացուցիչ` Intel GMA HD 515

Օպերացիոն համակարգ` Windows 10

Օպերատիվ հիշողություն` 8 ԳԲ

Ներկցված  հիշողություն` 256 ԳԲ

Անլար ինտերֆեյսներ` Wi-Fi 802.11 a/b/g/n/ac, Bluetooth 4.1

Տեսախցիկը` դիմային, 5 Մպ

Մարտկոցը` 33,7Wh

Չափսերը` 278,8х194,1х6,9 մմ

Քաշը` 640 գրամմ

 

 

Հավանեցի՞ր նյութը՝ կիսվիր քո կարծիքներով ։)